Pirritx, Porrotx eta Marimotots pailazoek Kuikui ikuskizuna eskaini dute gaur arratsaldean Soreasu antzokian, eta gogotik gozatu dute emanaldietara bertaratu diren herritarrek. Bi emanaldi eskaini dituzte larunbat arratsaldez, aurrenekoa 16:00etan hasita eta bigarrena 18:30ean hasita, eta bi txandetan jende ugari bertaratu da Kuikui ikuskizunaz gozatzera. Pirritx, Porrotx eta Marimotots pailazoen ikuskizun berria da Kuikui, eta euskara du ardatz. "Aitor eta Mariren hizkuntza zaharrari arnas bideak topatze aldera, euskararen gaiari eutsi nahi izan diogu aurtengoan", diote pailazoek. Abenduan estreinatu zuten lana, eta orduz geroztik, herriz herri ari dira hori taularatzen. Gaurkoan Azpeitian egin dute geldialdia, Uztaro haurreskolak antolatuta. Beste urte batez, kantu eta dantza, gogotik gozatu dute pailazoen istorioez Soreasura bertaratu diren herritarrek.