Domusa Teknik 40 MLK mendi lasterketa egingo dute maiatzaren 14an Azpeitian, eta proba horren harira, Mendi lasterketak eta emakumeak hitzaldia antolatu dute. Apirilaren 29an, ostirala, izango da solasaldia, eta antolatzaileek punta-puntako bi emakume korrikalari gonbidatu dituzte herrira gai hori jorratzeko: Oihana Azkorbebeitia (Abadiño, Bizkaia, 1981) eta Leire Baraibar (Areso, Nafarroa, 1979). Biak ala biak hainbat podium zapaldutakoak dira.
Antolatzaileek azaldu dutenez, jakinekoa da mendi lasterketen munduan oraindik ere emakumeen parte hartzea gizonezkoenaren "oso azpitik" dagoela, eta "are gehiago", distantzia luzeetako lasterketetan. Hori horrela, hitzaldiarekin, emakumeei ikusgarritasuna emateaz gain, korrikalari horien lorpenei aitortza egin nahi diete sustatzaileek. Hala, Azkorbebeitiak eta Baraibarrek askotariko gaien bueltan izan dituzten bizipenak eta beren ikuspuntuak azalduko dituzte apirilaren 29an, 19:00etatik aurrera, Basazabal jauregian.
Hitzaldiaren berri emateko elkartu dira Maialen Agirre Domusa Teknikeko parekidetasun batzordeko kidea, Egoitz Arruti eta Idoia Arrizabalaga Azpeitiko Udalakeko kirol eta parekidetasun zinegotziak, Arantxa Larrañaga Lagun Onak Mendi Bazkunako lehendakaria eta Iñigo Orbegozo Domusa Teknik lasterketako arduraduna.