Aste Santua iristearekin batera, Azpeitiko Burdinbidearen Euskal Museoak martxan jarri du lurrun trena. Atzo egin zituen tren horrek lehen bidaiak, eta gaur ere izan dute bisitariek hura ezagutzeko aukera. Gaurkoan, jendetza elkartu da Burdinbidearen Euskal Museoan, eta ilara luzeak sortu dira haren kanpoaldean.
Aste Santuko jaiegunetan, datorren astelehenera –hilak 18– bitartean egunero, ibiliko da lurrun trena museo aurretik Lasaora joan-etorrian. Egun horietan, 10:30etik 14:00etara eta 16:00etatik 19:30era zabalduko dute museoa. Goizean, 10:30ean egingo du trenak lehen irteera, eta jendea bertaratu ahala, 50 minutuko tartearekin jarriko dute martxan berriro. Arratsaldean, 16:30ean egingo du trenak lehen irteera.