Joan den asteartetik, 5 eta 12 urte arteko 150 haur eta gaztetxo ari dira parte hartzen, Azpeitian zein Urrestillan, udaleko Gazteria sailak Pazko Aste honetarako antolatutako ekintzetan.
Lau egunetako egitaraua prestatu dute antolatzaileek, eta bihar izango dute azken eguna. Lau egun horietatik hirutan goizez izan eta izango dituzte ekintzak umeek, baina atzo egun osoko irteerak egin zituzten. 5 eta 7 urte artekoak Donostiako Zientziaren Museoan izan ziren, eta 8 eta 12 urte artekoak, berriz, Oñatiko (Gipuzkoa) Arrikrutzeko kobetan.
Gaztelekuak ere eskaintza berezia
Gaztelekuak ere prestatu ditu aste honetarako aparteko ekintzak. Ohiko ordutegian dago zabalik Gaztelekua egunotan, baina herenegun kickboxing tailerra izan zuten bertan, Ainara Torviscoren eskutik. Gaur, berriz, Gazteak eta musika solasaldi eta zuzeneko musika emanaldien saioa izango dute Sanagustin kulturgunean.