Xabier Orbegozo Arria V.a eta Eneko Otaño elkartu ditu Erlo Telebistak Azpeitiko zezen plazan, igande honetan toki berean (12:00) jokatuko duten aizkora apustuaren bezperetan. Errezildarrak eta beizamarrak 20na kanaerdiko moztu beharko dituzte igandean, eta lanak azkarren bukatzen dituenarentzat izango da garaipena. Duela hiru hilabete hitzartu zuten apustua, eta gustura daude bi kirolariak denbora horretan egindako lanarekin. Sasoi onean iritsi dira hitzordura, eta etxean egindako lanaren emaitza plazan erakutsi gabe ez uztea da bien esperantza, dema bera eta jokoan jarri dituzten 5.000 euroak irabaztea alde batera utzi gabe, noski.
Sarreren txartelekin arazoak izan dituzte, eta gaur bertan dira jasotzekoak. Hain zuzen ere, iganderako sarrerak gaur jarriko dituzte salgai Azpeitiko Mendizabal erretegian, eta igandean bertan zezen plazako leihatilan ere bai, 30 euroren truke.