Urtz taldeak kontzertua eskainiko du zapatuan Sanagustin kulturgunean (22:00), eta oraindik ere bada emanaldirako sarrerak eskuratzeko aukera; 11 eurotan eros daitezke sarrerak Kulturaz.eus webgunean. Ez da nolanahiko kontzertua izango zapatukoa; izan ere, hamar urtez agertokietatik kanpo izan da musika taldea.
90eko hamarkadan talde ospetsua izan zen Urtz, eta itzulerako emanaldietako bat izango da zapatuan Azpeitian eskainiko duena. Baga-Biga disketxearen eskutik, Astiro lana kaleratu du taldeak, eta lan berri horretako kantak ez ezik, aurretik kaleratutako lanetan bildutakoak ere eskainiko ditu larunbatean.
Dantza garaikidea, igandean
Musika larunbatean, eta dantza igandean. Hain zuzen ere, dantza garaikidea oinarri duen Gorpuztu obra berria ikusi ahal izango da Soreasu antzokian. Eva Guerreroren emanaldirako sarrerak ere Kulturaz.eus webgunean eros daitezke, hamar euroren trukean.
Oreka bilatzearen inguruko lana da Gorpuztu, eta dantzariek zuzeneko musikak lagun eskainiko dute ikuskizuna. Garazi Lopez de Armentia dantzaria eta Yolando Bustillo, Nerea Alberdi, Carla Sevilla eta Cristina Samaniego musikariak izango dira agertokian.