Gipuzkoako Natura eta Ingurumen Zinemaren Erakustaldiaren zirkuitoan sartuko da aurten ere Azpeitia. Iazko esperientzia pilotuari jarraipena emanez, bigarrenez antolatu du Foru Aldundiak Gnat Zinema erakustaldia. Lurraldeko bederatzi udalerritan emango dituzte filmak maiatzaren 10etik 20ra bitartean. Azpeitian bi emanaldi egingo dituzte Soreasu antzokian, hilaren 12an eta 18an; emanaldien aurretik aurkezpena eta ondoren solasaldia egingo dituzte. Bi egunetan, 19:00etan hasiko dira proiekzioak, eta sarrera doan izango da.
Hilaren 12an Andoni Canelaren Panteras dokumentala emango dute Soreasun. Canelak eta haren seme Unaik lau urtez felido handien atzetik munduan zehar bizitako abentura jaso dute filmean. Mato Grossoko jaguarra, Kalahariko gepardoa, Rajastango tigrea, Patagoniako puma, Yalako lehoinabarra eta Himalaiako elurretako leopardoa igaroko dira, besteak beste, pantailatik. Andoni Canelak berak aurkeztuko du filma Azpeitian, eta emanaldiaren ondoren solasaldia izango da zuzendariarekin.
Hilaren 18an, berriz, Jorg Adolph eta Jan Haft zuzendarien La vida secreta de los árboles izango da ikusgai Soreasun. Peter Wohllebenen izen bereko liburu arrakastatsuan oinarritutako dokumentala da, eta idazlea bera da protagonista: "Wohllebenek modu entretenigarri eta argigarrian hitz egiten digu zuhaitzen elkartasunari eta kohesioari buruz, eta gero eta ugariagoa den irakurle komunitatearen barru-barruan jotzen du: basoan barrena egindako bisitaldietan, bertan bizi diren izaki bizidun harrigarri horietara hurbiltzen gaitu". Soreasun, filmaren aurkezpena eta ondorengo solasaldia Iñaki Aizpurua botanikan adituak gidatuko ditu.
Ikasleentzako emanaldiak
Aipatutako bi emanaldi irekiez gain, Gnat Zinemaren barruan DBHko 1. eta 2. mailetako ikasleei zuzendutako emanaldiak ere prestatu dituzte.
Azpeitian, Lexeia Larrañagaren eta Alexander Gutierrezen Natura Bizia dokumentala ikusteko aukera izango dute ikasleek hilaren 19an.