Maiatzaren hasieran ekin zioten Azpeitian Gipuzkoako Pala Luzeko Txapelketari, eta dagoeneko amaierara heltzen ari da. Datorren igandean, maiatzak 29, finalerdiak jokatuko dituzte lau bikotek Izarraitz pilotalekuan, 10:00etan. Alde batetik, Ilunpe taldeko Mikel Sanchez eta Eneko Martija azpeitiarrek Andoaingo taldeko pilotariak izango dituzte aurkari, eta, bestetik, Ordiziako eta Tolosako pilotariek neurtuko dituzte indarrak elkarren aurka. Beraz, finalerdia irabaziz gero, Ordiziaren edo Tolosaren aurka jokatu beharko dute finala azpeitiarrek.
Ilunpeko Erreminta Sailak adierazi duenez, txapelketaren finala Andoainen izango da, datorren ekainaren 5ean. Hasiera batean, txapelketako kanporaketa guztiak bezala, Azpeitian jokatu behar zuten finala ere. Egun horretan, ordea, Urrezko Aizkora Txapelketaren finala izango da Izarraitz pilotalekuan, eta, beraz, finala Andoainera lekualdatzea erabaki du Gipuzkoako Pilota Federazioak.