Iazko abenduan Azken Agurra Fest egitekoak ziren Azpeitiko Gaztetxean, In Your Face (I.Y.F) musika taldearen ibilbideari amaiera emateko. Dena den, "azken uneko osasun arazo bat tarteko", bertan behera utzi behar izan zuten musika jaialdia, eta orain jakinarazi dute haren data berria: hain zuzen ere, larunbatean, uztailak 2, egingo dute festa.
17:00etan zabalduko dituzte Gaztetxeko ateak, eta ordu horretatik aurrera, hainbat kontzertu izango dira. In Your Face taldeaz gain, honako musika talde hauek igoko dira oholtzara: Aurrez Aurre, Cold Revenge, Estutu, Sentenciados, Inguma, No Limits eta Yakovlev 42. Zuzeneko horiek amaitzean, DJak ariko dira. Bost euro ordaindu beharko da kontzertuetarako sarrera.