Jendea muga-mugan dago. Tourra oso gogorra izaten ari da aurten: 43 kilometro orduko batez besteko abiadura, bero handia eta zigorra etapa guztietan, garaipenak inoiz baino garestiago daudelako. Carcasonako atseden eguna gustura hartu du tropelak, azken astean gorriak ikustekotan baitira asko. Bihar, etzi eta etzidamu Pirinioetako hiru etapak korrituko dira, bata bestearen atzetik. Gogortasuna, gainera, handitzen joango da egunetik egunera, eta osteguneko etapa izan bide da denetan gogorrena, gauza gehien argitu ditzakeena. Eguraldiari buruz apuntetxo bat, azken egunetako labeak tenperatura atseginagoari emango baitio bide. 30 graduak ozta-ozta gaindituko dira bailaretan, eta mendi gainetan 18-22 gradu artean. Horiek tenperatura normalak dira uztailean, eta beroa ez da faktore erabakigarria izango Pirinioetan.
Hiru etapa. Lehenengoa ez da hain gogorra, Port de Lers eta Mur de Peguere 'bakarrik' igoko direlako (bakarrik kakotx artean). Bi mendate horiek tenteak dira, batez ere Mur de Peguere. Azken hiru kilometroek %13, %12,6 eta %11ko malda dute, eta tarteka %16 eta %18ko pendizak ere bai. Gainetik Foixeko helmugara 27 kilometro daude, tarteka eman beharreko jaitsiera guneak. Asteazkeneko etapako bigarren zatia gaiztoa da, segadak egiteko aproposa. Behin Arreau herria pasatuta, Aspin hasieran, atsedenik ez da izango. eta lau mendate bata bestearen atzetik kateatuko dituzte: Aspin, Hourquette d'Ancizan, Val-Louron Azet eta Peyragudes. Etzanagoak lehen biak, tenteak azken biak. Eta ostegunean plater nagusia, Pirinioetako gogorrena eta Alpeetako etapen pare jar daitekeena, 140 kilometroko etapa laburra izanda ere. Hirugarren etapa exijentea da jarraian, eta 80 kilometrotan 3.300 metroko desnibel positiboa izango du. Asko da hori jarraian, eta igoko diren mendateak historikoak eta gogorrak dira. Aubisque, aurrena, mendate mitikoa. Luzea, 17 kilometro, eta %7,1eko malda. Spandelles, ondoren: ezezaguna, baina bihurria eta errepide estukoa. Erne Soulorretik beherako jaitsieran: 10 km., %8,3ko batez besteko malda. Eta Hautacam, beste mamu bat, bukatzeko. Irregularra? bai, baina malda handikoa, itogarria. Eta indarrak muga-mugan daudela. Zenbaki hotzak: 13,6 km. eta %7,8ko batez besteko pendiza. Ostiralean etapa laua osatuko da, larunbatean 40 kilometroko erlojupekoa eta igandean festa, Les Champs Elysees...
Zer gertatuko da? Dakienak aberats. Egitateak, hauek: Pogacarrek ezin du Vingegaard atzeratu. Saiatu da dozena erditan, baina ezin. Ahalko ote du Pirinioetan? Erraza ez. Taldeen lana garrantzitsua izango da, baina Pogik Vingegaard askatzen ez badu, UAEren ekimen oro ez da emankorra izango. Jumbo ahulduta geratu da Roglic eta Kruijswijk gabe, baina Benoot, Kuuss eta Van Aert morroi onak dira. Parekatuak daude indarrak. Podiumeko hirugarren koskarako Geraint Thomasena da hautagaitzarik sendoena, batez ere larunbatean bere ezaugarrietarako aldekoa den erlojupeko luzea duelako. Txakalaldiak gerta litezke. Quintana, Bardet, Vlasov, Pidcock, Mas, Lutsenko, Meintjes... Horiek urrunetik erasotzen saia daitezke, eta urduritasuna eragin. Adam Yatesen rola ere erabakigarria izan bide da. Zer egingo du? Iraun edo arriskatu? Granon mendatean bukatu zen etapan gertatu bezala, tabloi handiak harrapatzeko arriskua dago, eta erne.
Pronostikoa, Parisen.
Garaile: Vineko
2. sailkatua: Pogi
3. sailkatua: G
Top 5: Gaudu eta Bardet
Sorpresak: Vlasov eta Nairoman.