Desenkajonamentua eta Udal Musika Bandaren pasodobleen kontzertua, biharko

Biharkoa festa egun handia ez den arren, izango da zertaz gozatua herrian. Hain zuzen ere, ur parkea jarriko dute arratsaldean Perdillegin, eta ondoren, bi urteko etenaren ostean, zezenzaleek hainbeste itxarondako hitzordua izango da: desenkajonamentua, hain zuzen ere. 19:00etan hasiko da hori, zezen plazan. Ohikoa den moduan, ondorengo egunetan toreatuko dituzten zezenak erakutsiko dituzte: aurtengoan, Ana Romero, Murteira Grave eta La Palmosilla izango dira zezenketetan parte hartuko duten ganadutegiak.

Gauean, 22:00etan hasita, Udal Musika Bandaren pasodobleen kontzertua izango da, plazan. Hain zuzen ere, hainbat pasodoble doinu entzun ahal izango dira, eta biharkoan sei pieza berri joko ditu bandak lehen aldiz; zehazki, aurtengo zezenketetara etorriko diren sei toreatzaileri eskainitako kantak izango dira.

Unai Frantzesena bandaren zuzendariak azaldu duenez, sei pasodoble horietatik lau Espainiako bandei eskatuta lortu ditu: Pozoblanco (Kordoba, Espainia), Olivenza (Badajoz, Espainia), Hellin (Albacete, Espainia) eta Villafranca de los Barros (Badajoz, Espainia). Beste bat Frantzian erosi dio bandak egileari, eta seigarrena Peruko banda bati eskatuta eskuratu dute. "Azken hori gure bandaren formatura egokitu, moldatu eta konpondu behar izan dut, arkatzez idatziriko paper batzuen argazkiak bidali baitzizkidaten".