VII. Joxan Arabiotorre txapelketa jokatu zuten zapatuan Hernanin (Gipuzkoa), eta senior mailan Emakumezkoen Gipuzkoako 20 urtez azpiko selekzioa izan zen nagusi. Gipuzkoako Selekzioarekin aritu ziren Lagun Onak futbol taldeko Eguzkiñe Peña entrenatzailea eta Eneritz Landa eta Naroa Muñoz futbolariak. Gipuzkoako Selekzioak Hernaniren aurka jokatu zuen finala, eta 0-1 gailendu zen markagailuan. Reala C sailkatu zen hirugarren eta Osasuna, berriz, laugarren. Lortutako garaipena tarteko, Lagun Onakek klubeko hiru kideak zoriondu zituen sare sozialetan.
Denera, zortzi taldek parte hartu zuten txapelketan. Infantil mailan, lau taldek parte hartu zuten: Hernani, Añorga, Osasuna eta Eibar. Senior mailan ere lau talde aritu ziren nor baino nor: Hernani, Osasuna, Reala C eta Gipuzkoako Selekzioa.