Donostiako Zurriola hondartzan binakako boleibol txapelketa jokatu zuten joan zen larunbatean, eta Leire eta Beltzane Aizpuru ahizpa azpeitiarrek irabazi zuten lehia, 19 urtez azpikoen kategorian. Leirek 17 urte ditu, eta Beltzanek 15. Guztira, zazpi partida jokatu behar izan zituzten txapelketan; lehen jardunaldian lautik hiru neurketa irabazi zituzten, eta bigarren jardunaldian, partida guztietan izan ziren nagusi. Horrenbestez, lehen postua eskuratu zuten sailkapenean, eta "oso gustura" dago bikotea. "Ez genuen espero txapelketa irabaztea", adierazi diote hedabide honi bi ahizpek.
Duela urtebete inguru hasi ziren Aizpuru ahizpak boleibolean; lehen Goierri boleibol taldean aritzen ziren, eta orain, Donostiako Fortuna taldeko kide dira. Duela gutxi izan dute Zurriolako txapelketaren berri, eta lehen aldiz lehiatu dira han. Azpeitian ez dago boleibola praktikatzeko ohitura handirik, eta orain arte, Urretxun (Gipuzkoa) egin dituzte entrenamenduak; dena den, aurrerantzean Donostiko taldearekin egingo dituzte lansaioak.