Herriko hainbat adinekoren egoera aztertzeko aldi baterako gizarte langile bat kontratatuko du Azpeitiko Udalak. Hain zuzen ere, Azpeitian bakarrik bizi diren pertsonen zein mendekotasun prestazioa jasotzen dutenen egoera ikertzea izango da langile horren egiteko nagusia. Sei hilabeteko kontratua eskaintzen du udalak. Interesa dutenek Lanbideren bidez eman beharko dute izena lan eskaintza horretan; gaur zortzira arte, urriaren 6a arte, eman daiteke izena.
Udalaren lan eskaintza horretan izena emateko, "ezinbestekoa" izango da Gizarte Langile ikasketak izatea, baita EGA edo euskarako 3. hizkuntza profila egiaztatzea ere. Bestetik, lanpostura aurkezten direnak DBEren –diru sarrerak bermatzeko errenta, RGI erdaraz– onuradun izatea "baloratuko" du udalak.
Lanbideren ondoko orrialdean daude udalaren lan eskaintzaren xehetasunak.