Urola Erdiko trikitiaren hitzorduak badu data: urriaren 28an, ostiralez, egingo dute Trikigiro jaialdiaren zazpigarren ekinaldia, Trikigiro kultur elkarteak eta Kulturaz kooperatibak antolatuta. Horren aurretik, giroan sartzeko, erakusketa jarri dute Sanagustin kulturgunean; gaur, osteguna, zabaldu dute, eta urriaren 30era bitartean izango da ikusgai. Bertan, eskualdeko trikiti munduari lotutako hainbat argazki ikus daitezke, zuri-beltzean.
Trikigiro eguneko egitaraua ere jakinarazi dute dagoeneko. 19:00etan trikitilari gazteen emanaldia izango da Sanagustin kulturgunean. 20:00etan, kalejira egingo dute, eta ondoren, argazki erraldoia atera. 21:00etan, topaketan bildutako trikitilariek afaria egingo dute Sanagustinen; menua 20 euro ordaindu beharko da, eta kulturaz.eus atarian nahiz Sanagustinen eman daiteke izena. 23:00etan, erromeria izango da, eta halaxe, trikiti giroan amaituko dituzte eguneko ekintzak.