Amaitzear da Organo Erromantikoaren Nazioarteko XXIII. Zikloa. Atzo arratsaldean eskaini zuten zikloaren barruko Loiolako baselizako hirugarren eta azken emanaldia. Atzokoan Xabier Urtasun organistaren eta Rita Morais sopranoaren doinuak izan ziren protagonistak Loiolan, eta hainbat lagun bertaratu zen entzunaldiaz gozatzera. Bertan izan zen Itziar Urbieta organista azpeitiarra ere. Atzoko emanaldiarekin amaitu dira Loiolako hitzorduak. Azken bi ostiraletan emanaldi bana izan da Loiolan. Lehen emanaldia David Cassanek eskaini zuen, eta bigarrena, berriz, Loreto F. Imaz eta Itziar Urbieta organistek.
Azpeitiko saioak amaitu badira ere, Organo Erromantikoaren Nazioarteko XXIII. Zikloa ez da bukatu. Gaur, urriak 22, Ignacio Arakistain organo-jotzaileak kontzertua eskainiko du Bergarako Santa Marina parrokian, Peio Irigoien txistulariarekin batera. Hilaren 29an, berriz, Azpeitiko eta Bergarako musika eskoletako organo ikasleen agerraldiarekin amaituko da aurtengo zikloa.