3x3 Futbol Festa jokatuko dute asteburuan Azkoitian. Larunbatean, igandean eta asteartean jokatuko dute Azpeitia Cup taldeak antolatutako txapelketa, eta guztira, 180 taldek eman dute izena. Hori horrela, HH4 eta LH6 mailen arteko 800 neska-mutil baino gehiago elkartuko dira herriko plazan.
Urtero bezala, antolatzaileek kamiseta banaketa egingo dute hitzordua baino lehen. Hain zuzen, 3x3 Futbol Festan izena eman duten Azpeitiko taldeek etzi, osteguna, jaso beharko dituzte kamisetak Kontzejupean, 17:15etik 19:00etara bitartean. Era berean, parte hartzaile bakoitzak domina bat jasoko du oroigarri gisa. Gainerako herrietako taldeek lehen partidaren egunean jaso ahalko dute elastikoa.
Azpeitia Cupen hitzetan, "arrakasta biribila" izan du aurtengo 3x3 Futbol Festaren izen-emateak. 400 futbol partida baino gehiago jokatuko dituzte Azkoitiko plazan, eta dagoeneko igorri diete talde bakoitzari ordutegien dokumentua. Futbol Festaren hiru egunetan Azkoitiko, Azpeitiko, Errezilgo, Zestoako, Urretxuko, Zumarragako, Zumaiako eta Zarauzko haurrak arituko dira futbolean herriko plazan.