XXXIII. Ipuin Kontaketen barruan hiru eguneko egitaraua prestatuta ari dira ospatzen Liburutegien Nazioarteko Eguna Azpeitiko Udal Liburutegian. Atzo, urriaren 24a, izan zen Liburutegien Nazioarteko Eguna, eta arratsaldean izan zuten hiru eguneko egitarauaren lehen hitzordua; Lehen Hezkuntzako 1. eta 2. mailetako haur ugari elkartu ziren Ixabel Agirresaroberen emanaldia jarraitzera (argazkian).
Gaur eta bihar egingo dituzte aste berezi honen barruko beste bi ipuin kontaketa saioak. Gaur, Anduriña Zurutuza ipuin kontalaria ariko da liburutegian, Haur Hezkuntzako 4. mailako haurrei zuzendutako saioarekin; bihar, berriz, Lupe Lekuonaren eta Haur Hezkuntzako 5. mailako umeen txanda izango da.
Joan den ostiralean itxi zuten izen ematea atzotik bihar arteko ipuin kontaketetara joan nahi zutenentzat. Hiru saioak 17:30erako programatu dituzte.