Eneko Martija eta Mikel Sanchez palistek Gipuzkoako Kluben Arteko Txapelketaren finala jokatuko dute. Lehen aldiz ari da lehiatzen Ilunperen erreminta saileko bikotea larruzko paleta modalitatean. Horrenbestez, txapelketaren hirugarren mailan ari dira, baina finaleko txartela eskuratzearekin bat, datorren urtean bigarren mailan jokatzeko eskubidea lortu dute jada.
Aurretik, ordea, hirugarren mailako txapela izango dute jokoan. Etzi, Olaberrian, Andoaingo Gazteleku klubeko ordezkarien kontra ariko dira. 10:30ean hasiko da finala, eta txapelketaren bigarren eta lehen mailakoak ere jokatuko dituzte segidan Olaberriko frontoian.
Lehen partaidetza honetan, Beotibar (Tolosa), Ospele (Orio) eta Oiangu (Ordizia) klubetako bikoteekin lehiatu ziren Ilunpekoak hasierako ligaxkan. Lehen postuan bukatu zuen Azpeitiko bikoteak hasierako fasea, eta finalaurrekoetara igaro zen horrela. Finalaurrekoan, joan den astean, 35-32 gainditu zituzten Martijak eta Sanchezek Debako Euskal Jolaseko ordezkariak.