Joan den asteazkenean, urriaren 26an, izandako gertaera baten berri eman dute Azpeitiko Kortzu baserrikoek. Hain zuzen ere, ume egiten ari zen ardi bati eraso egin zion putre talde batek, eta denbora gutxian ardia akabatu eta haren bi arkumeek azken arnasa eman zuten. Etxe ondoko zelaian gertatu zen hori, eta bertako baserritarrak arkume bat etxeko sukaldera bizirik eraman bazuen ere, ez zuen asko iraun.
Gertaera horren aurrean, "babes gabe eta beldurtuta" daudela jakinarazi dute Kortzu baserrikoek. "Artzaintzan jarraitu nahi duen gazte bat dago baserrian, baina horrelakoak eta agintarien ardura eza ikusita, ilusioa galtzen ari da. Putreak ezin dira hil, baina zer gertatzen da beraiek hiltzen duten ganaduarekin?", adierazi dute.