Gau Beltzik ez, baina "Egun Beltza" ospatuko dute bihar Izarraizko Ateko skate parkean. Halloween Jam festa antolatu du zapatu arratsalderako YK Riders herriko skate, BMX, scooter, dirt eta roller taldeak, eta bertara joateko asmoa dutenei mozorrotuta agertzeko dei egin diete.
16:00etan hasiko da festa skate parkean. Musika, merienda eta jokoak aurkituko dituzte bertaratzen direnek. Horiez gain, YK Ridersek eta Lagun Onak BTT-k karpa jarriko dute, besteak beste kamisetak saltzeko, eta Sergio Layos rider-ak sinatutako argazki baten zozketan parte hartzeko aukera izango da.