Urteko hitzordurik berezienetakoa izango du zapatuan Lagun Onaken talde nagusiak Garmendipen. 17:00etan hasita, Anaitasunaren kontrako derbia jokatuko du Azpeitiko futbol taldeak, Espainiako Hirugarren Mailako ligaren hamabigarren jardunaldian. Partidaren berezko garrantziari beste osagai bat gehituko zaio. Izan ere, gaur iragarri du Lagun Onakek Oinatz Elustondo omenduko duela klubak zapatuko derbiaren atarian.
Aurten utzi du futbola Elustondok, 2021-2022 denboraldiaren bukaeran, besteak beste, hamabi urtez Lagun Onaken gizonen talde nagusiaren kapitain izan ondoren. "Hamabi denboraldi lehen taldean, eta bizitza oso bat klubaren armarria eta besokoa haundienen erara, duintasunez defendatzen. Mila esker, Oinatz!". Mezu horrekin iragarri du futbol klubak sare sozialetan bere "kapitain handienetariko bat" izandakoari egingo dioten omenaldia.