Bi urteko etenaldiaren ostean, Tuba Jaialdia tarteko, hainbat musikari elkartu ziren asteburuan Azpeitian. Egitasmoaren antolatzaileek jaialdiaren balorazio positiboa egin dute, aurreikusitako ekintza guztiak gauzatu ahal izan zituztelako eta musikaz gozatu ahal izan zutelako. "Helburu nagusia berriro elkartzea eta orain arteko ibilbideari jarraipena ematea zen, eta emanaldi bereziak zein aberasgarriak izan ditugu", azaldu dute.
Zapatuko Tuba Eguna "lagun giro bikainean" egin zutela azpimarratu dute egitasmoaren sustatzaileek; izan ere, 30 musikari inguru elkartu ziren eta hainbat ekintza egin zituzten. Iluntzeko tuba eta bonbardino kontzertua "arazo tekniko batzuk medio" atzerapen txiki batekin hasi bazuten ere, jaialdiari amaiera "ezin hobea" eman ziotela adierazi dute. Halaber, Juan Carlos Ribellesi egindako aitortza "hunkigarria" izan zela esan dute antolatzaileek.