Txindoki Atletismo Taldeak antolatuta, Txindoki Krosa jokatu zuten atzo, igandea, Ordiziako (Gipuzkoa) Oiangu parkean. Ia 300 korrikalari lehiatu ziren korrika egiteko prestatutako zirkuituan, maila ezberdinetan banatuta. 20 urtez azpikoen kategorian, Julen Azpiazu azpeitiarra nagusitu zen. 4.400 metroko ibilbidea osatu behar izan zuen Xeye atletismo taldeko kideak, eta hamabost minutu eta 49 segundo behar izan zituen proba amaitzeko.
"Oso gustura" agertu da Azpiazu garaipenaren ostean. "Pista estaliko probak ari naiz prestatzen, eta Ordiziako krosa prestaketa moduan hartu nuen. Pistan lehiatzeko gogoz nago, eta marka politak egitea gustatuko litzaidake. Oso ondo doaz entrenamenduak", adierazi du.