Olentzero eta Mari Domingi Azpeitian izan dira eguerdi partean. San Martin egoitzatik abiatuta, kalejira egin dute aurrena, herriko kaleetan barrena, eta ondoren, plazan egin dute geldialdia. Itsasi dantza taldeko haurrek agurra dantzatu diete bi lagunei, eta ondoren, Azpeitiko Ikastola Karmelo Etxegaraiko, Azpeitiko Ikastola Ikasberriko eta Iraurgi Ikastetxeko ikasleek bertsoak kantatu dizkiete. Olentzerok nahiz Mari Domingik gaztainak eman dizkiete plazara joan diren umeei, eta elkar agurtzeko aprobetxatu dute abagunea.