Errege Magoen laguntzaileak herrian izan dira gaur arratsaldean. 17:30ean iritsi dira Sanagustinpera, eta ordurako ilaran zain zituzten dozenaka ume eta guraso, Meltxorri, Gasparri eta Baltasarri zuzendutako eskutitzak eskuetan zituztela. Pajeei gutunak eman eta haiekin solasalditxoa izan eta argazkiak ateratzeko aukera izan dute haurrek, eta esku bete gozoki jaso dute bueltan.
Gaur laguntzaileak izan dira Azpeitian, eta bihar, Errege Magoen txanda izango da. 17:00 inguruan iritsiko dira Lasaora, eta hango umeak agurtu ostean, txu-txu trenean egingo dute herrigunerako bidea. 17:30 aldera parrokiara joango dira hango jaiotza ikustera eta han zain izango dituzten haurrei kasu egitera. Ondoren, 19:00etan, igerilekutik hasiko da erregeen kabalkada. Ohi bezala, Errege Magoek herriko ikastetxeetako ikasleak izango dituzte bidelagun ibilbidean. 20:00 aldean iritsiko dira plazara, eta udaletxeko balkoitik agurtuko dituzte herritarrak.