Udal Musika Bandak Errege eguneko kontzertua eskaini du gaur eguerdian Sanagustin kulturgunean. Hain zuzen, musika bandaren urteko lehen emanaldia izan da gaurkoa, eta jende ugari bertaratu da emanaldiaz gozatzera. Kontzertua 12:30ean hasi da, eta kulturgunean elkartutakoek askotariko doinuez gozatzeko parada izan dute gaurkoan; izan ere, Unai Frantsesenak gidatuta, estilo desberdinetako hamar pieza jo dituzte emanaldian zehar: Flourish for wind band, Donostia, The voice of the guns, Bandology, La greve des musiciens, Air for winds, The syncopated clock, 5a sinfonia & Mambo N 5, If i can dream eta Conga del fuego nuevo.
Gainera, umore kutsua jarri diote emanaldiari Udal Musika Bandako kideek. Hain zuzen, La greve des musiciens abestia probestu dute protesta antzezteko, eta hainbat kartel atera dituzte aldarrikapenak egiteko, umorez eta txantxaz. Besteak beste, "berogailua kioskoan", "Kaldereroetan megafonia bakarrik" eta "komisioa dimisioa" irakur zitekeen horietan. Pixkanaka-pixkanaka oholtzatik jaisten joan dira musikariak, baita zuzendaria ere, eta musikari bakarra gelditu denean beste kartel bat atera du hark: "Zer, ni bakarrik gaizki?", zioen. Barrez erantzun dute kulturgunean elkartutako herritarrek. Horrez gain, dantzarako tartea ere izan da, eta bandaren musikaren erritmora dantzatu dute herriko bi dantzarik.
Hona hemen La greve des musiciens abestia eta protesta irudikapena, bideoan: