Euskal musika eszenaren punta-puntan dabil azken boladan En Tol Sarmiento (ETS) taldea, eta martxoaren 24an Azpeitian eskainiko duen kontzerturako sarrera guztiak aspaldidanik daude agortuta; are gehiago, Kulturaz kooperatibak saltzen jarri eta ordu gutxira amaitu ziren.
Orain, baina, beste emanaldi baterako data iragarri du Azpeitiko kultur kooperatibak. Hain zuzen ere, apirilaren 16an, igandea, Azpeitian bigarren kontzertua eskainiko du Arabako taldeak. 18:30ean izango da, Sanagustin kulturgunean, eta hara joan nahi dutenek dagoeneko eskura ditzakete sarrerak Kulturazen webgunean, 21 euroren trukean.
ETSk Guretzat diskoa aurkeztuko du bi emanaldietan Azpeitian. Pop doinuak eramango dituzte musikariek Sanagustingo agertokira.