Hirukidek, Euskadiko Familia Ugarien Elkarteen Federazioak, aurkezpen saioa egingo du datorren asteartean, otsailaren 7an, Azpeitian. Baigera I-eko aretoan izango da saioa, 18:00etan. Hala ere, egun berean goizez (09:30etik 14:00etara) eta arratsaldez (15:30etik 17:30era) Baigeran egongo direla jakinarazi dute Hirukidekoek, aurkezpenera joan ezin dutenei arreta eskaintzeko.
Hirukide beraren zerbitzuen eta jardueren berri emateaz gain, Araban, Bizkaian eta Gipuzkoan familia ugarientzat dauden hobariak, zerbitzuak edota laguntzak azalduko dituzte asteartean Baigeran, baita zehazki Azpeitian eskaintzen zaizkienak ere. "Azken hilabeteotan eta urteetan kolektibo honi zuzenduta izan diren berritasunak azalduko dira, familia ugari askok ez baitituzte ezagutzen", azaldu du Hirukidek, besteak beste argindarraren bonu soziala aipatuta. Informazio "zehatza" emateaz gain, familiek izan ditzaketen zalantzak, iradokizunak edota erreklamazioak erantzuteko tartea ere hartuko du Hirukidek Azpeitiko aurkezpenean.