Adinekoen zaintzaren garrantzia jardunaldietako bigarren saioa izango da gaur, asteazkena, 18:00etan Azoka Plazako lehen solairuko aretoan. Bakardadeaz hitz egingo dute Javier Yanguas gerontologoa eta psikologian doktoreak eta Ainhoa Becerra Adinberri fundazioko Berrikuntza ataleko arduradunak. Besteak beste, Adinberri Fundazioaren Hariak estrategiaren inguruko xehetasunak azalduko dituzte.
Gaurko eta jardunaldietako hurrengo saioan keinu hizkuntzaren interprete batek parte hartuko du, herritarrek eskatutakoari erantzuteko.
Otsailaren 1ean hasi zituzten Adinekoen zaintzaren jardunaldiak, eta harrera bikaina jaso zuen lehen saioak, ehun lagunetik gora bildu ziren.
Otsailaren 15ean izango da hirugarren saioa, eta orduan mendekotasuna duten pertsonentzako Perdillegiko zentro balioanitzaren proiektua aurkeztuko dute. Hizlari ariko dira Matia institutuko Maider Azurmendi eta Enrique Etxeberria nahiz Maite Peña Gipuzkoako Foru Aldundiko Gizarte Politikako diputatua eta Nagore Alkorta Azpeitiko alkatea.