Urola Erdiko Itaiak antolatutako bikotekako Emakumeon I. Pala Txapelketaren finalaurrekoak eta finala jokatuko dituzte larunbatean Azpeitian. Jaialdia Frontoi Txikian izango da, 10:00etan hasita. Finalaurreko partidak jokatuko dituzte aurrena; eta ondoren, 12:00 aldera, izango da finala. Sari banaketaren ostean, bazkaria egingo dute Azoka Plazan, eta horrekin emango diote bukaera txapelketari.
Urola Erdiko Itaiak txapelketa antolatu duen lehen aldia izan da aurtengoa. "Urola Erdiko Itaia duela bi urte pasatxo hasi zen martxan. Hasieratik, garrantzi handia eman diogu lan ideologikoari, eta hainbat espazio jarri ditugu martxan genero problematika klase ikuspegitik lantzeko, hala nola Emakume Langileon Eskolak edota Indarkeria Matxistari Aurre Egiteko Asanblada. Baina, horrez gain, eskualde mailan elkar ezagutzeko eta sozializatzeko aisialdirako eremuak sortzea ere ezinbestekoa zaigu, eta helburu hori lortzera begira, Emakumeon I. Pala Txapelketa antolatu dugu", azaldu dute Itaiako kideek. "Pozik" dira lehen edizioak izan duen harrerarekin eta parte hartzearekin; izan ere, eskualdeko hamahiru bikotek parte hartu dute lehian.
Joan den hilean ekin zioten txapelketari, eta aste honetan bertan ari dira final laurdenak jokatzen, larunbateko finalaurrekoetara nor sailkatu erabakitzeko. Antolatzaileek jakinarazi dutenez, larunbatean, bikote guztiek Frontoi Txikian egon beharko dute 09:30erako. Bazkaria, berriz, 14:30ean izango da Azoka Plazan, eta dagoeneko salgai daude txartelak Azpeitiko Haginpe tabernan. Dena dela, bertan erosteko aukera ere egongo da