Aste honetan hasi dira Arana Goikoa auzoan ur hornidura sarea hobetzeko lanean. Auzoko ur hoditeria eta espaloiak berrituko dituzte, hemezortzi asteko epean. Obrak Gipuzkoako Urak eta Azpeitiko Udalak duten hitzarmenaren barruan egingo dituzte, eta bi erakundeen artean 445.745 euro inbertituko dituzte Arana Goikoan ur azpiegiturak berritzeko.
Lanak egin bitartean sor daitezkeen arazo eta eragozpenengatik "barkamena" eskatu die udalak auzokideei.
Arana Goikoa auzoko ur hornidura sarea hobetzeko, fibrozementuzko hodiak eta galvanizatuak kenduko dituzte, eta fundiziozkoak jarriko. Era horretan, auzoan "ur kantitate eta presio hobea" jasoko dute auzotarrek, udalak esan duenez. Saneamenduko sarean, berriz, ur zikinak eta euri urak banatzeko obrak egingo dituzte. Ur azpiegiturak berritzearekin batera, espaloiak berritu eta irisgarritasuneko araudira egokituko dituzte.