Karnabalak bukatu berritan, bi irteeraren eta horietan izena emateko epeen berri eman du Baigera jubilatuen elkarteak.
Lehendabizikoa martxoaren 16an egingo dute. Egun horretan, Astigarragako (Gipuzkoa) Petritegi sagardotegian bazkalduko dute Azpeitiko jubilatuek, goiz-pasa ibili ondoren: 08:30ean irtengo dira Azpeititik, San Martun egoitza paretik, eta 14:00etan izango dute bazkaria sagardotegian. Irteera horretarako izen-ematea irekita dago dagoeneko; martxoaren 14a bitartean eman behar dute izena Baigeran joan nahi dutenek, 35 euroren truke.
Irailean, Pirinio inguruetara
Baigerakoek martxoan irekiko duten bestea da irailaren 14rako eta 15erako prestatzen ari diren bi eguneko txangorako izen-ematea. Pirinio inguruetan ibiliko dira iraileko bi egun horietan Azpeitiko jubilatuak, Jacan eta Ainsan (Aragoi, Espainia), eta Otsagabian (Nafarroa).
Iraileko irteeran izena eman nahi dutenek martxoaren 6tik ekainaren 29ra eman dezakete izena, 110 euroren truke.