Ados Pilota klubaren Binakako Txapelketa Nagusiko finalerdiak jokatu zituzten atzo arratsaldean Azpeitiko Izarraitz pilotalekuan, eta dagoeneko erabakita daude promozio mailako eta lehen mailako aurreneko finalistak. Hain zuzen, promozio mailan, Natale Aranburuk eta Olatz Insaustik eskuratu dute final handirako txartela eta lehen mailan Naroa Agirrek eta Goiuri Zabaletak.
Promozio mailako partida gogorra bezain luzea izan zen, eta Lazkaoko aurrelariak beste erritmo bat jarri zion partidari. Haren lana "erabakiorra" izan zen urdinen garaipenean. Lehen mailako partidan, konturatu orduko Zabaletak eta Agirrek zuloa ireki zuten markagailuan, eta urdinei konturatzerako ihes egin zien partidak. Zabaletak eta Agirrek uste baino errazago lortu zuten finalerako txartela, nagusitasunez aritu ziren kantxan, eta 22-12 irabazi zuten Ainhoa Ruiz de Infante eta Oihana Orbegozo azpeitiarraren aurka.
Gaur erabakiko dira Binakako Txapelketa Nagusiko beste bikote finalistak nor izango diren. Labriten jokatuko dituzte finalaurrekoak 11:30ean hasita.