San Jose jaiak ospatzeari ekin diote dagoeneko Loiolako bizilagunek. Atzo iluntzean eman zieten auzoko festei hasiera Kiruri jatetxean egin zuten Mus Txapelketarekin.
Gaur arratsaldean, 17:00etan hasita, umeentzako marrazki topaketa egingo dute, eta horren ostean, merienda. Bihar, berriz, 11:00etatik 13:00era puzgarriak izango dira umeentzat, eta 12:30erako herri kirol erakustaldia antolatu dute. Aizkoran ariko dira Mikel Larrañaga eta Julen Alberdi Txiki IV.a, eta harri jasotzen, berriz, Jon Unanue Goenatxo III.a eta Xabier Aranburu Guzta. Trikitilariak ariko dira giroa alaitzen.