Hilabete batzuk falta dira oraindik ere aurtengo San Inazio jaietarako, baina Azpeitiko Zezenzale Batzordea hasia da dagoeneko zezenketak prestatzen. Hiru zezenketa izango dira aurtengoan, batzordeak adierazi duenez: uztailaren 30ean, uztailaren 31n eta abuztuaren 1ean.
Oraindik ez dute zezenketetarako prestatu duten kartelaren berri eman, baina aurreratu dituzte dagoeneko Azpeitian izango diren toreatzaile batzuen izenak. Hain zuzen ere, iazko gisan, aurten ere saninazioetako zezenketetan izango da Morante de la Puebla toreatzailea, baita Daniel Luque ere –zazpigarren aldiz izango da Azpeitiko zezen plazan–.