Esku pilotako Promozio mailako Buruz Burukoa jokatuko du aurten ere Julen Egigurenek. Aurrelari azpeitiarrak atzo lortu zuen txapelketaren koadro nagusirako sarbidea. Ezcarayn (Errioxa, Espainia), Aspe enpresaren pilotarien arteko lehen aurrekanporaketan, 22-18 irabazi zion Egigurenek Gaskueren ordez jokatu zuen Aaron Arbizu debutari nafarrari.
Gaur, berriz, Jon Alberdiren txanda izango da. Baikoko aurrelari azpeitiarrak Buruz Buruko Txapelketa Nagusiaren final zortzirenetako partida jokatuko du arratsaldean Tolosan (Gipuzkoa), Peio Etxeberria nafarraren kontra. Gaurko partidaren irabazleak egingo du aurrera txapelketan, eta Darioren kontra jokatuko du hurrengo partida, ostiral honetan, Azkoitian.