Estreinaldi garratza izan du Jon Alberdik esku pilotako Buruz Buruko Txapelketa Nagusian. Iaz Promozio mailakoa irabazi ondoren, aurrekanporaketan Agirreri irabazita lortu zuen aurrelari azpeitiarrak txapelketa nagusian aritzeko txartela, baina final zortzirenetako lehen koskan esan dio agur lehiaketari, eta porrot gogorra jasanda, gainera.
Peio Etxeberriarekin neurtu zituen indarrak atzo Alberdik kanporaketa horretan, Tolosako (Gipuzkoa) Beotibarren, eta nafarrak oso aise gainditu zuen azpeitiarra, 22-2. Aukerarik ez zion eman Etxeberriak Alberdiri, eta azpeitiarra ezinean aritu zen, bere onena eman ezinda.