Euskararekin eta euskaraz jolas egiteko, Xapokeitan galdera-erantzunen jolasa sortu dute Azpeitiko Udalak eta Uztarriak elkarlanean. Guztira, 232 lagunek eman dute izena. Izena emateko epea amaituta, izena eman duten guztiek jaso dute posta elektronikoz jolasean parte hartu ahal izateko erabiltzaile eta pasahitza. Oraindik proba egin ez dutenek, hauek dituzte horretarako azken egunak, jokoa astelehenean, apirilak 17, hasiko baita. Inork arazorik edo zalantzarik balu, helbide honetara idatzi beharko du: lehiaketa@ukt.eus.
Hamalau egunez, hilaren 17tik 30, egunero erantzun beharko dira galderak, asteburuetan ere bai. Parte hartzaile bakoitzak egunean hamar galdera erantzun beharko ditu, 08:00etatik 00:00etara bitartean. Galdera bakoitzak hiru erantzun posible izango ditu –horietako bakarra izango da zuzena–, eta parte hartzaileak bat aukeratu beharko du.
Behin hamalau egun horiek igarota, finala jokatuko da, maiatzaren 9an, Sanagustin kulturgunean eta herritarren aurrean.
