Azpeitiko Udala Urola eta Ibai Eder ibaiak garbitzen aritu da asteotan, eta erakundeak azaldu duenez, dagoeneko bukatu dituzte lanok. Zehazki, bi eremutan garbitu dute ibaia: Aldakaitzetik (Loiola) Basabe ingurura arteko 3,5 kilometro; eta Azoka Plazatik Antxieta Txikira arteko 4,2 kilometro. Orotara, zazpi kilometro garbitu dituzte, eta ibaitik 1.820 kilo hondakin atera dituzte.
Ibai garbiketa eskuz egin dute, eta bildutako hondakinak Lapatx zabortegira eraman dituzte, gaika salkatuta. Bildutako 1.820 kilo hondakinetatik 1.250 kilo errefusa dira, 300 kilo plastikoa, 250 kilo txatarra, hogei kilo egurra eta bi kilo gurpilak. Bilketa egiteko 16.279 euroko inbertsioa egin du udalak.
Erakundea 2020. urtean hasi zen Urola ibaia modu sakonean garbitzen, eta urtez urte, eremu edo ibai zati desberdinak garbitzen ditu, kontratazio bidez. Udalaren arabera, Azpeitian "garrantzi handia" du Urola ibaiak, herria "alderik alde eta erditik" zatitzen duelako: "Presentzia nabarmena du ibaiak herrian, eta azken urteotan, ibaiari eta haren inguruari balioa emateko eta hura babesteko lan neurri ezberdinak hartu ditu udalak".