Eskuko telefonoa noiz eman behar zaie haurrei eta zein da tresna horren erabilera egokia? Gizartean gero eta kezka handiagoa eragiten duen galdera da hori, eta gai hori gizarteratzeko, mahai ingurua antolatu dute Azpeitiko Udalak eta herriko hiru ikastetxeetako guraso elkarteek elkarlanean. Gaur, asteazkena, izango da solasaldia, 18:00etan hasita, Sanagustin kulturgunean, Noiz eta nola eman mugikorra seme-alabei izenburupean.
Hasiera batean, Telmo Lazkano No Phone Challenge –Mugikorraren Auziaren Programa– egitasmoaren sortzailea eta Tolosako (Gipuzkoa) Altxa Burua nahiz Usurbilgo (Gipuzkoa) Hitz Aho guraso elkarteetako ordezkariak ziren parte hartzekoak saioan, baina azkenean, Zarauzko (Gipuzkoa) guraso bat ere bertaratuko da. Horrez gain, Azpeitiko guraso batek ere hartuko du hitza, herrian zertan ari diren azaltzeko.