Azpeitiko pilotariek asteburu honetan jokatuko dituzte 2023ko Gipuzkoako Herriarteko Txapelketaren lehen neurketak.
Esku pilotako lehian, Larraulen jokatuko du gaur Azpeitiak final zortzirenetako kanporaketaren joanekoa, 18:00etatik aurrera. Hauek dira Ilunpek gaurkorako osatu dituen bikoteak: Iñigo Sarasua eta Jokin Artetxe (kadeteak), Beñat Labaka eta Beñat Ezama (jubenilak), eta Iker Egiguren eta Josu Labaka (seniorrak). Azpeitia egungo txapeldunordea da; Larraulek, berriz, lehen aldiz jokatuko du Herriartekoa, eta txapelketan lehiatuko diren herrien artean txikiena da.
Azpeitiko palistek, berriz, etxean jokatuko dituzte Debaren kontrako final laurdenaren joaneko partidak. Bihar goizean dute hitzordua Izarraitzen, 11:00etan. Larruzko paletan, Eneko Martijak eta Mikel Santxezek osatuko dute bihar Azpeitiko bikotea; pala motzeko partidan, berriz, Asier Egiguren Bikutze eta Urtzi Lopetegi izango dira Azpeitiko ordezkariak.