Bordelen Akitaniako Aquitanima nekazaritza feriaren barruan, blonda arrazako ganadu txapelketa jokatu zen joan den asteburuan. Azpeitiko Eizmendi baserriko Idoia Esnaolaren ustiategiak parte hartu zuen txapelketan, eta emaitza bikainak lortu zituen. Eizmendiko Nekane behiak txapelketan hiru lehen sari eskuratu zituen: behirik onenarena, 5 urtetik gorako txahaldun behien sailekoa eta txahaldun behien sail orokorrekoa. Sari horiez gainera, ukuilurik onenaren saria ere lortu zuen Eizmendi baserriak Bordeleko txapelketan.
Sari horiez gainera, bigarren eta hirugarren sariak ere jaso zituen Eizmendik: Regina bigarekin 24 eta 36 hilabetekoen artean, eta Olaia behiarekin 4 eta 5 urteko behien sailean. Hirugarren bi sari ere eskuratu zituen Eizmendi baserriak, Laia behiarekin txahalik gabeko 5 urtetik gorakoen artean eta Olibiarekin 5 urtetik gorako txahaldun behien sailean. Longak, berriz, hirugarren saria eskuratu zuen Sara bigarekin 1 eta 2 urte bitarteko bigen sailean.
