Burdinbidearen Euskal Museotik Lasaoko geltokira joan-etorriak egiten dituen lurrun trenaren zerbitzuak 25 urte beteko ditu, eta igande honetan, ekainaren 11n, ospatuko dute mende laurdena museoan. 1998ko ekainaren 12an egin zuten Azpeitia-Lasao-Azpeitia ibilbidean lehen bidaia, Aurrera lurrun trenarekin.
Hain zuzen ere, tren historikoen zirkulazio bereziak prestatu dituzte 25. urtemuga ospatzeko. Hiru izango dira, guztira, eta hirurak etzi goizean:
- 11:00etako irteeran, Alsthom 1004 diesel trakziozko tren makinak egingo du Azpeitia-Lasao-Azpeitia bidea; Euskal-Asturiar Trenbideen Konpainiarena zen Azpeitiko museoan gordetzen eta erabiltzen duten tren hori, Tarben (Okzitania) egina, 1965ean.
- 12:00etako irteeran, berriz Zugastieta lurrun trenaren txanda izango da. 1888koa da Zugastieta, Sharp Stewartek Glasgown (Eskozia) Amorebietatik Gernikarako trenerako egina.
- 13:00etako irteeran, azkenik, Aurrera tren makina erabiliko dute, duela 25 urte museoa eta Lasao lotu zituen lehendabizikoa. 1898an Nasmyth & Wilsonek Manchesterren (Ingalaterra) Elgoibartik Donostiarako trenerako egindako makina da Aurrera.
Igandeko ospakizun jardunaldia borobiltzeko, eguneko irteeretan parte hartzen duten bidaiari guztiek txartel berezi bana jasoko dute, 25. urtemugaren oroigarri.