Uztailaren 30ean, 31n eta abuztuaren 1ean –San Inazio bezpera, eguna eta bigarrena– egingo dituzte aurten saninazioetako zezenketak, eta atzo aurkeztu zituen horiek Azpeitiko Zezenzale Batzordeak. Iaz bezala, Bilboko Cocherito zezenzale klubean egin zuten aurkezpena; aurtengo hiru zezenketez gain, aurten ere Jorge Urizarrrek egin duen 2023ko Azpeitiko feriaren kartela ere aurkeztu zuten atzokoan.
Joxin Iriarte Zezenzale Batzordeko buruak hartu zuen hitza aurkezpenean. Haren esanetan, "batzorde hau lanean hasi zenetik osatu diren kartelik onenak" osatu dituzte aurtengorako.
Hauek dira San Inazio jaien barruan Azpeitiko zezen plazan egingo dituzten zezenketetan parte hartuko duten toreatzaileak eta ganadutegiak:
Uztailak 30, igandea. San Inazio bezpera
- Toreatzaileak: Diego Urdiales, Daniel Luque eta Diego Carretero.
- Ganadutegia: Ana Romero.
Uztailak 31, astelehena. San Inazio eguna
- Toreatzaileak: David de Miranda, Jesus Enrique Colombo eta Angel Tellez.
- Ganadutegia: Murteira Grave.
Abuztuak 1, asteartea. San Inazio bigarrena
- Toreatzaileak: Morante de la Puebla, Paco Ureña eta Juan Ortega.
- Ganadutegia: La Palmosilla.
Desenkajonamendua eta sarrerak
Saninazioetako zezenketetan toreatuko dituzten zezenen desenkajonamendua, berriz, uztailaren 27an, osteguna, egingo dute zezen plazan, 18:30ean.
Zezenketetarako sarrerei dagokienez, hirurak ikusteko abonuak uztailaren 3an jarriko dituzte salgai zezen plazako leihatilan; abonuz kanpoko sarrerak, berriz, uztailaren 15etik aurrera salduko dituzte.