Ez da asko falta aurtengo ikasturtea bukatzeko, eskolako materiala bildu eta udaz gozatzeko, eta gaur, ostiralez, 2022-2023 sasoiari bukaera emateko festak egin dituzte Azpeitiko Ikastola Karmelo Etxegarain eta Azpeitiko Ikastola Ikasberrin.
Ikasberrin, goizean goizetik ekin diete ezohiko jarduerei; 09:30etik 13:00etara, mendi irteerak, jolasak eta abar egin dituzte, eta gurasoak ere gonbidatu dituzte horietan parte hartzera. Arratsaldean, berriz, 16:00etatik 18:15era, jolasak eta bestelako ekintzak egin dituzte ikastolako jolastokian, eta puzgarriak ere jarri dituzte. Besteak beste, patata tortilla lehiaketa egin dute; hamalau taldek parte hartu dute, 50 bat ikaslek. Gero, 18:15ean, txaranga gazteak emanaldia eskaini du, eta 18:30etik 19:30era, ekitaldia egin dute. Ekitaldi horretan, besteak beste, orla banaketa egin dute. 19:30etik 20:00etara, berriz ere puzgarrietan ibiltzeko aukera izango dute haurrek; eta 20:00etan, txotxa zabalduko dute. Festari bukaera emateaz, Skapaie elektrotxaranga arduratuko da.
Karmelo Etxegarain, berriz, 17:00etan ekin diote jaiari. Ordu horretatik aurrera, Perdillegiko eraikineko ingeleseko gelan itzalekin jolasean aritzeko aukera izan dute HHko eta LHko haurrek; gimnasioan, dantza mordernoa egiteko aukera izan dute –LHkoek 17:00etatik 17:45era eta HHkoek 18:00etatik 18:45era–; eta Mugi-Mugi gelan yoga egiteko aukera izan dute –4 eta 6 urte artekoek 17:10etik 17:30era, 7 eta 9 urte artekoek 17:30etik 18:00etara ea 10 urtetik gorakoek 18:00etatik 18:45era–. Horien ostean, 19:00etan, trikitilariekin kalejira egin dute Perdillegiko eraikinetik Urola Ikastolara, eta 19:15ean, LH 6koak agurtu dituzte. Ekitaldia bukatzeko, dantza modernoko ikasleek dantza egin dute. Festari emaiera emateko, 20:00etan afari-merienda egingo dute, eta iluntzea Josu Merino DJak girotuko du. Guztira, 700 lagunetik gora elkartuko dira afaltzeko.