Getariako erreginaren festa izan da gaurkoan Azpeitian. Hain zuzen ere, Txakolin Eguna egin dute Perez Arregi plazan, 12:30etik 14:30era. Eguraldi eguzkitsuak lagunduta, jende ugari bertaratu da, eta giro ederra izan da nagusi.
Zortzi upategitako txakolina dastatzeko aukera izan dute herritarre: Agerre, Aitaren, Akarregi Txiki, Ameztoi, Flysch, Gañeta, Inazio Urruzola eta Murgialdai txakolindegietakoak, hain zuzen ere. Edanari laguntzeko, jatekorik ez da falta izan. Herriko bi gaztagileren –Berastegiko eta Premietxeberriko – gazta eta Lumagorri oilasko pintxoak salgai jarri dituzte plazan.
Kopa eta bost txakolin dastatzeko aukera izan dute bertaratu direnek 5 euroren trukean, eta pintxo bakoitzeko bi euro ordaindu behar izan dituzte. Herriko Gaixo eta Elbarrien Aisialdi Taldeko kideak arduratu dira pintxoak banatzeaz.