Ostiralean, hilak 21, goi mailako pilotariekin hitzordua izango dute pilotazaleek Urrestillako Txikuri pilotalekuan, Caixabank Masters torneoaren edizio berriaren lehen jardunaldia. 22:00etan hasiko da goi mailako pilota jaialdia, eta sarrerak oraindik eskuragai daude Urrestillako Bixker erretegian.
Sei bikote lehiatuko dira 2023ko Caixabank Mastersean: Elordi-Albisu, Ezkurdia-Mariezkurrena II.a, Peña II.a-Rezusta, Altuna III.a-Imaz, Jaka-Martija eta Larrazabal Zabaleta. Bost jardunaldiko sailkapen ligaxka batek, play-offek, finalaurrekoek eta finalak osatuko dute torneoa. Ostiralean, Peñak eta Rezustak Ezkurdiaren eta Mariezkurrenaren kontra jokatuko dute Urrestillan. Jaialdiaren partida nagusia izango da hori; baina aurrez, jaialdiko lehen neurketan, Jon Alberdik eta Iztuetak Julen Egigurenen eta Eskuzaren kontra jokatuko dute.