Iristear dira festak, eta bihartik aurrera, Santio egunarekin batera, trafikoan eta aparkalekuetan aldaketak iragarri ditu Azpeitiko Udalak.
Santio eguneko ganadu feria eta txosnagunea tarteko, Zelai Luzeko errepidea itxita izango da trafikoarentzat uztailaren 25etik abuztuaren 5a bitartean. Bihar 06:00etan itxiko dute errepidea.
Bestalde, asteburutik egokituta daude Jesuitinen eta Perdillegiko Karmelo Etxegarai ikastolako eraikinaren jolaslekua aparkaleku gisa, festak amaitu bitartean.
Azpeitiko Udalak datozen egunetan ibilgailuak "beharrezkoa" direnean soilik erabiltzeko eskatu die herritarrei, eta horiei barkamena eskatu die jaietan trafikoari lotuta sor daitezkeen eragozpenak tarteko.
Autobusen geralekuetan aldaketak
Santio eta San Inazio festak direla eta, Azpeitiko autobusen geralekuetan ere aldaketak izango dira uztailaren 25etik abuztuaren 4ra bitartean. Tren Museoaren aurreko geltokian eta Julian Elorza hiribidekoan ez da autobusik gelditu. Horien tokian, autobusak saihesbidean, Enparan Gainean izango dute geralekua.