Ohiturari jarraituz, San Inazio bigarrenez meza izango da Loiolan, eta ohikoa denez, Azpeitiko Udaleko hautetsiek harrera egingo diete Gipuzkoako Foru Aldundiko nahiz Eusko Jaurlaritzako ordezkariei. Duela urte batzuetara arte harrera ekitaldi hori udaletxearen aurrean, plazan, egin ohi zuten, baina orain Loiolan egiten dute; beraz, han elkartuko dira erakundeetako ordezkariak 10:30ean, meza baino lehen –11:00etan izango da elizkizuna–.
Azpeitiko Udalak duela aste batzuk bidali zuen erakundeetara Loiolako harrerara joateko gonbidapena, eta jaso ditu erantzun batzuk. Erakundeak Uztarria.eus-i azaldu dionez, Iñigo Urkullu lehendakaria Azpeitian izango da San Inazio bigarrenez, baita Jokin Bildarratz Hezkuntza sailburua eta Gotzone Sagardui Osasun sailburua ere. Halaber, Gipuzkoako Foru Aldundiko eta Batzar Nagusietako ordezkaritza handia izango da Loiolan; besteren artean, han izango dira Eider Mendoza ahaldun nagusia eta diputatuak.